LA-1994-603
| Instans: | Agder lagmannsrett - Dom |
|---|---|
| Dato: | 1994-09-29 |
| Publisert: | LA-1994-00603 |
| Stikkord: | Strafferett |
| Sammendrag: | |
| Saksgang: | - Agder lagmannsrett LA-1994-00603 M. |
| Parter: | Den offentlege påtalemakta (Aktor: Statsadvokat Kjetil Omholt) mot 1. A, 2. B, 3. C (Forsvararar: For nr. 1. Adv. Kim Gerdts, Oslo For nr. 2. Adv. Oscar Ihlebæk, Oslo For nr. 3. Adv. Tore Ihlebæk, Oslo). |
| Forfatter: | 1. Lagdomar Asbjørn Nes Hansen,formann 2. Eks.ord.lagdomar Birger Lassen 3. Eks.ord.lagdomar Bjørn Paulson |
| Lovhenvisninger: | Straffeloven (1902) §162, §34, §37d, §54, §62, §63, Fengselsloven (1958) §41, Straffeprosessloven (1981) §437, Legemiddelloven (1992) §24, §31 |
Statsadvokatane i Vestfold og Telemark har 17. august 1994 sett A, B og C under tiltale ved Agder lagmannsrett, Telemark lagsokn.
A er sett under tiltale til domfelling etter:
"I. Straffeloven §162, første og annet ledd,jf. femte ledd for ulovlig å ha innført, ervervet, oppbevart eller overdratt stoff som etter regler med hjemmel i lov er ansett som narkotika, og overtredelsen anses som grov, idet det særlig legges vekt på hva slags stoff det gjelder, kvantumet og overtredelsens karakter, eller medvirket til dette, jf.Sosialdepartementets narkotikaforskrifter av 30. juni 78 og Helsedirektørens narkotikaliste, hvoretter bl.a. amfetamin skal regnes som narkotika, ved at han:
a. i tidsrommet høsten 1993 - januar 1994 i Nederland eller andre steder, ervervet minst 500 gram amfetamin, eller medvirket til dette,
b. i tidsrom som nevnt i post Ia, innførste minst 500 gram amfetamin til Norge, eller medvirket til dette,
c. søndag 09. januar 94 i - - -gate 66 i X, overdro minst 500 gram amfetamin til D, eller medvirket til dette.
II. Straffeloven §162, første ledd jf femte ledd for ulovlig å ha overdratt stoff som etter regler med hjemmel i lov er ansett som narkotika, eller medvirket til dette, jf. Sosialdepartementets narkotikaforskrifter av 30. juni 78 og Helsedirektørens narkotikaliste, ved at han høsten 1993 i - - - - 13 i X, overdro ca 25 gram amfetamin til E, eller medvirket til dette."
I tiltalevedtaket heiter det vidare:
"Straffeloven §62 første ledd kommer til anvendelse.
Straffeloven §54 nr. 3, jf. fengselsloven §41, kommer til anvendelse i forhold til prøveløslatelse fra soning av Agder lagmannsretts dom av 18. september 87 med resttid på 955 dager.
I forbindelse med straffesaken vil det bli nedlagt påstand om at tiltalte dømmes til å tåle inndragning av kr 87000, jf. straffeloven §34, jf. §37d, første ledd."
B er sett under tiltale til domfelling etter:
"I. Straffeloven §162, første og annet ledd, jf. femte ledd, for ulovlig å ha oppbevart stoff som etter regler med hjemmel i lov er ansett som narkotika, og overtredelsen anses som grov, idet det særlig legges vekt på hva slags stoff det gjelder, kvantumet og overtredelsens karakter, eller medvirket til dette, jf Sosialdepartementets narkotikaforskrifter av 30. juni 78 og Helsedirektørens narkotikaliste, hvoretter bl.a. amfetamin skal regnes som narkotika, ved at han torsdag 13. januar 94 ved - - - og på bopel i - - -gate 66 i X, oppbevarte 415,816 gram amfetamin, eller medvirket til dette.
II. Straffeloven §162 første ledd, for ulovlig å ha oppbevart stoff som etter regler med hjemmel i lov er ansett som narkotika, jf. Sosialdepartementets narkotikaforskrifter av 30. juni 78 og Helsedirektørens narkotikaliste, hvoretter bl.a. cannabisharpiks (hasjisj) skal regnes som narkotika, ved at han onsdag 06. oktober 93 i sin celle i Skien kretsfengsel i Skien, oppbevarte ca 6 gram hasjisj.
III. Legemiddelloven §31, annet ledd, jf. §24, første ledd, for uten lovlig atkomst å ha vært i besittelse av eller brukt narkotika m.v. jf. Sosialdepartementets narkotikaforskrifter av 30. juni 1978 og Helsedirektørens narkotikaliste, hvoretter bl.a. amfetamin skal regnes som narkotika, ved at han i januar 1994 i X, brukte amfetamin.
I tiltalevedtaket heiter det vidare:
"Straffeloven §62 første ledd og eventuelt §63 annet ledd kommer til anvendelse.
Straffeloven §54 nr. 3, jf. fengselsloven §41, kommer til anvendelse i forhold til prøveløslatelse fra soning av Skien og Porsgrunn forhørsretts dom av 04. oktober 93 med resttid på 69 dager."
C er sett under tiltale til domfelling etter:
"I. Straffeloven §162, første og annet ledd. jf. femte ledd for ulovlig å ha ervervet og oppbevart stoff som etter regler med hjemmel i lov er ansett som narkotika, og overtredelsen anses som grov, idet det særlig legges vekt på hva slags stoff det gjelder, kvantumet og overtredelsens karakter, eller medvirket til dette, jf. Sosialdepartementets narkotikaforskrifter av 30. juni 78 og Helsedirektørens narkotikaliste, hvoretter bl.a. amfetamin skal regnes som narkotika, ved at hun
a. søndag 09. januar 94 på bopel i - - -gate 66 i X, ervervet minst 500 gram amfetamin av A, eller medvirket til dette,
b. torsdag 13. januar 94 ved - - - og på bopel i - - -gate 66 i X, oppbevarte 415,816 gram amfetamin, eller medvirket til dette.
II. Legemiddelloven §31 annet ledd, jf. §24 første ledd for uten lovlig atkomst å ha vært i besittelse av eller brukt narkotika m.v., jf. Sosialdepartementets narkotikaforskrifter av 30. juni 1978 og Helsedirektørens narkotikaliste, hvoretter bl.a. amfetamin skal retgnes som narkotika, ved at hun i januar 1994 i X, brukte amfetamin."
I tiltalevedtaket heiter det vidare:
"Straffeloven §62 første ledd og eventuelt §63 annet ledd kommer til anvendelse.
Straffeloven §54 nr. 3 kommer til anvendelse i forhold til Skien og Porsgrunn byretts dom av 20. desember 93."
A er fødd xx.xx.1936 og opplyser å ha fast bustad i Nederland. Han er for tida innsett i varetektsfengsel. Han er norsk statsborgar og er uføretrygda med ei utbetaling på om lag kr 5000 i månaden. Han er gift, har ingen born å forsyta og opplyser å vera utan eige. A er straffedømd to gonger tidlegare for narkotikabrot. Ved den førre domen i 1987 vart han dømd til 8 års fengsel. A har ikkje sagt seg skuldig etter nokon post i tiltalen.
B er fødd xx.xx.1965 og er no utan fast bustad. Han er for tida innsett i varetektsfengsel. B er arbeidslaus og utan inntekt og eige. Han er gift med C. Han har ikkje born å forsyta. B er straffedømd sju gonger tidlegare, hovudsakleg for vinnings- og narkotikabrot. Han er og botlagd fleire gonger. B har sagt seg delvis skuldig etter post I i tiltalen, og skuldig etter post II og III.
C, tidlegare - - - -, er fødd xx.xx.1963 og er no utan fast bustad. Ho er for tida innsett i varetektsfengsel. C er arbeidslaus og utan inntekt og eige. Ho er gift med B. Ho har ikkje born å forsyta. C er straffedømd ein gong tidlegare, hovudsakleg for vinnings- og narkotikabrot. Ho er botlagd ei rekkje gonger. C har sagt seg skuldig etter alle postane i tiltalen.
Det er lagt fram tre spørsmålsskrift for lagretta, eit for kvar av dei sakgjevne. For A inneheld spørsmålsskriftet fire hovudspørsmål, for B tre hovudspørsmål og eit tilleggsspørsmål og for C tre hovudspørsmål. Spørsmålsskrifta svarar i hovudsak til dei tre tiltalevedtaka. I spørsmålsskriftet som gjeld A er det likevel gjort ei mindre endring i høve til tiltalen, utan at statsadvokaten og forsvararen har hatt noko å innvenda. Endringa går ut på at tidsromet med omsyn til dei strafflagde handlingane i spørsmål 1 og 2 er sagt å vera frå "høsten 1993 - januar 1994 eller tidligere".
Lagretta har svara ja på alle spørsmåla. Retten har lagt avgjerdene til lagretta til grunn for domen i saka. Dei tre sakgjevne vert etter dette straffedømde i samsvar med tiltalen, jf. likevel den nett nemnde endringa i spørsmålsskriftet som gjeld A.
I samband med straffutmålinga skal retten - dei tre juridiske domarane, ordføraren for lagretta og dei tre uttrekte lagrettemedlemene - nemna:
Alle tre sakgjevne vart sette fast av politiet torsdag 13. januar 1994. Fyrst vart B teken i - - - i X med 28,546 gram amfetamin på seg. Stoffet var fordelt på tre pakningar og var gøymt i trusa hans. Stoffet er seinare identifisert som ei blanding av amfetaminsulfat og koffein, til dels og druesukker. Det er påvist høvesvis 35, 40 og 34 vektprosent amfetaminsulfat i dei tre funna. Ved ransaking i bustaden til C og B i - - -gate 66 i X vart det funne sju pakningar med i alt 387,27 gram amfetamin på kjøkenet. Stoffet er seinare identifisert som ei blanding av amfetaminsulfat, koffein og druesukker, og inneheld høvesvis 31, 27, 30, 33, 34, 34 og 35 vektprosent amfetaminsulfat. Det vart og funne kr 14950 i kontantar ved ransakinga av bustaden i - - -gate. Ved ransaking av bilen til A vart det funne kr 87000 i pengesetlar i hanskeromet.
C har forklara at ho hadde avtala med A at han skulle skaffa henne om lag 500 gram amfetamin. Ho har forklara at ho tinga stoffet etter initiativ av og oppdrag frå ein person ho ikkje vil namngje, og at hennar rolle skulle vera å ta i mot stoffet, levera det til denne tredjepersonen og ta med attende til A pengar for leveransen. Det skulle betalast kr 250 for 1 gram, i alt kr 125000. For denne tenesta skulle C få eit vederlag i form av amfetamin frå A. Etter at A hadde kome med stoffet til henne sundag 9. januar 1994, viste det seg - forklarar ho - at denne tredjepersonen ikkje ville ta imot stoffet. Etter avtale med A tok ho då på seg sjølv å freista verta "kvitt" amfetaminen. Ho har opplyst at ho etter veging kom fram til ei mengd på om lag 530 gram amfetamin.
Dagen etter at C hadde fått overlevert amfetaminen, kom B ut frå fengsel etter soning av dom. Han flytte då inn i den sams bustaden i - - -gate 66. Dei to var på den tid sambuarar, og har seinare gift seg. Båe har vedgått å ha brukt av amfetaminen i tidsromet fram til dei vart tekne av politiet 13. januar 1994, og det er denne narkotikabruken som post III i tiltalen mot B og post II i tiltalen mot C gjeld. Den amfetaminmengda B hadde på seg 13. januar, var ein del av det partiet C hadde overteke frå A. I alt vart det såleis kverrsett 415,816 gram amfetamin av det samla partiet som opphavleg skal ha vore på over 500 gram. For mogelege disposisjonar over den manglande mengda - utover eige bruk frå sambuarane si side - er det ikkje reist tiltale.
Ved domfellinga av C vert det lagt til grunn at ho "ervervet" vel 500 gram amfetamin av A den 9. januar 1994 og at ho den 13. januar "oppbevarte" 415,816 gram amfetamin, jf. post I a. og b. i tiltalen mot henne. Ved domfellinga av B byggjer retten på at han har "oppbevart" eller medverka til "oppbevaring" av heile den amfetaminmengda som vart kverrsett 13. januar 1994, jf. post I i tiltalen mot han.
Domfellinga av B etter post II i tiltalen mot han gjeld "oppbevaring" av om lag 6 gram hasjisj i celle i X kretsfengsel den 6. oktober 1994. Han har forklara at han hadde vore ute på permisjon og henta stoffet i bustaden sin. B har vedgått dette tilhøvet.
Ved domfellinga av A vert det lagt til grunn at han har overdrege vel 500 gram amfetamin til C, jf. post I c. i tiltalen mot han, og om lag 25 gram amfetamin til E, jf. post II i tiltalen. Når det gjeld det sistnemnde tilhøvet, har E forklara at A overdrog denne amfetaminmengda til henne vederlagsfritt på hennar førespurnad, og overleveringa skjedde hausten 1993 i den dåverande bustaden til E i - - - - 13 i X.
Ved domfellinga av A med omsyn til post I a. og b. i tiltalen mot han, vert det lagt til grunn at han har "ervervet" i Nederland eller andre stader i utlandet og innført til Noreg, eller medverka til desse handlingane, dei amfetaminmengder som seinare vart overdregne til C og E. Det er etter provføringa i saka ikkje visst å seia nett når "erverv" og innførsle skjedde. A har ikkje vore viljug til å forklara seg om dei strafflagde handlingane i det heile. Retten veit såleis heller ikkje noko om A har samverka med andre personar og i tilfelle på kva måte.
For A vert straffa sett til fengsel i 6 år. Straffa er fastsett under omsyn til straffeloven §62 fyrste leden. Straffa er samstraff med resttida på 955 dagar etter soning av Agder lagmannsretts dom frå 18. september 1987, jf. fengsellova §41, jf. straffeloven §54 nr. 3. A har sete i varetektsfengsel sidan 13. januar 1994, og har krav på varetektsfrådrag med 260 dagar.
Ved straffutmålinga har retten i straffaukande lei lagt vekt på at A, som ikkje er nokon stoffmisbrukar sjølv, på ein kynisk måte har skaffa til veges, innført og overdrege amfetamin til misbrukarmiljøet i Y for å oppnå økonomisk vinning. Overdraging av stoff utan vederlag til E tyder på at han på denne måten har freista å skaffa seg innpass i miljøet. Allmennpreventive omsyn talar med tyngd for å reagera særleg strengt mot slike som utan sjølve å sokna til misbrukarmiljøet er med på å spreia farlege narkotiske gifter som amfetamin. Straffaukande er det og at A er dømd to gonger tidlegare for alvorleg narkotikakriminalitet, og at dei tilhøva han no vert dømd for, ligg innanfor prøvetida etter at han vart sett fri frå soning av førre domen den 18. mai 1992. I straffminkande lei veit retten ikkje noko særskilt å nemna.
Statsadvokaten har sett fram påstand om inndraging av vinning til føremon for statskassa med kr 87000, jf. straffeloven §34, jf. §37d fyrste leden. Dette er dei pengane som vart funne i bilen til A den 13. januar 1994. A har ikkje kunna gje ei rimeleg forklaring på kvifor han hadde så mykje kontantar liggjande i bilen sin. Ut frå det som har kome fram om dei økonomiske tilhøva hans, lét det seg ikkje forklara at han på lovleg vis har fått tak i desse pengane. Det verkar ikkje sannsynleg at han har lånt pengane av ein kjenning i Nederland, slik han hevdar. Retten legg etter dette til grunn at pengane er vinning som er oppnådd ved ei strafflagd handling, og tek inndragingskravet til fylgje.
For B vert straffa sett til fengsel i 2 år. Straffa er fastsett under omsyn til straffeloven §62 fyrste leden. Straffa er samstraff med resttida på 69 dagar etter soning av Skien og Porsgrunn forhøyrsretts dom frå 4. oktober 1993, jf. fengsellova §41, jf. straffeloven §54 nr. 3. B har sete i varetektsfengsel sidan 13. januar 1994, og har krav på varetektsfrådrag med 260 dagar.
Retten har i straffaukande lei lagt vekt på at B er straffedømd ei rekkje gonger tidlegare for narkotikabrot, og at dei tilhøva han no vert dømd for, dels er gjorde medan han var innsett til soning og dels like etter at han vart sett fri på prøve den 10. januar 1994. Jamvel om B ikkje er tiltala for medverking til "erverv" av amfetaminmengda, er det eit alvorleg straffebrot han har gjort seg skuldig i ved å "oppbevare" eller medverka til "oppbevaring" av amfetaminen etter at sambuaren overfor A hadde teke på seg å la stoffet gå vidare. Ut frå prova i saka må det leggjast til grunn at han har spela ei noko mindre sentral rolle enn C, og det har retten teke omsyn til ved straffutmålinga.
For C vert straffa sett til fengsel i 2 år og 6 månader. Straffa er fastsett under omsyn til straffeloven §62 fyrste leden. Straffa er samstraff med vilkårsdelen av Skien og Porsgrunn byretts dom frå 20. desember 1993, jf. straffeloven §54 nr. 3. C har sete i varetektsfengsel sidan 13. januar 1994, og har krav på varetektsfrådrag med 260 dagar.
Retten har i straffaukande lei lagt vekt på at C har hatt ei sentral rolle ved disponeringa av ei amfetaminmengd på vel 500 gram. Ho har stilt seg til rådvelde på ein aktiv måte for å gjera det mogeleg å spreia denne farlege og samfunnsskadelege gifta til misbrukarmiljøet i Y, og omsynet til allmennprevensjonen talar for ein fast straffereaksjon. Den sakgjevne er sjølv amfetaminmisbrukar, og det kan ut frå prova i saka vera vanskeleg å seia i kva grad omsynet til økonomisk vinning har vore motiverande for henne. C har ved si forklaring ytt eit avgjerande tilskot for oppklaring av saka og domfelling av ein av bakmennene, og dette må koma henne til gode i ikkje liten mon ved straffutmålinga.
Sakskostnader vert etter omstenda ikkje pålagde, jf. straffeprosessloven §437 tredje leden.
Domen er samrøystes.
Dom:
1. A, fødd xx.xx.1936, vert dømd for tre brotsverk mot straffeloven §162 andre leden, jf. fyrste og femte leden og eit brotsverk mot straffeloven §162 fyrste leden, jf. femte leden, alt samanhalde med straffeloven §62 fyrste leden, til ei straff av fengsel i 6 - seks - år. Straffa er samstraff med resttida etter soning av Agder lagmannsretts dom frå 18. september 1987, jf. fengsellova §41, jf. straffeloven §54 nr. 3. Til frådrag i straffa går 260 - tohundreogseksti - dagar for varetektsfengsel.
2. Til føremon for statskassa vert det hjå A inndrege vinning med 87000 - åttisjutusen - kroner, jf. straffeloven §34, jf. §37d. fyrste leden.
3. B, fødd xx.xx.1965, vert dømd for eit brotsverk mot straffeloven §162 andre leden, jf. fyrste og femte leden, eit brotsverk mot straffeloven §162 fyrste leden og eit brotsverk mot legemiddellova §31 andre leden, jf. §24 fyrste leden, alt samanhalde med straffeloven §62 fyrste leden, til ei straff av fengsel i 2 - to - år. Straffa er samstraff med resttida etter soning av Skien og Porsgrunn forhøyrsretts dom frå 4. oktober 1993, jf. fengsellova §41, jf. straffeloven §54 nr. 3. Til frådrag i straffa går 260 - tohundreogseksti - dagar for varetektsfengsel.
4. C, fødd xx.xx.1963, vert dømd for to brotsverk mot straffeloven §162 andre leden, jf. fyrste og femte leden og eit brotsverk mot legemiddellova §31 andre leden, jf. §24 fyrste leden, alt samanhalde med straffeloven §62 fyrste leden, til ei straff av fengsel i 2 - to - år og 6 - seks - månader. Straffa er samstraff med vilkårsdelen av Skien og Porsgrunn byretts dom frå 20. desember 1993, jf. straffeloven §54 nr. 3. Til frådrag i straffa går 260 - tohundreogseksti - dagar for varetektsfengsel.