LG-2000-645
| Instans: | Gulating lagmannsrett - Dom |
|---|---|
| Dato: | 2000-08-18 |
| Publisert: | LG-2000-00645 |
| Stikkord: | |
| Sammendrag: | |
| Saksgang: | Sunnhordland herredsrett nr. 99-00496 - Gulating lagmannsrett LG-2000-00645. Anken tillates ikke fremmet for Høyesterett, HR-2000-01253. |
| Parter: | Den offentlige påtalemyndighet (Aktor: Statsadvokat Randi L. Gabrielsen) mot A (Forsvarer: Advokat Anders Brosveet). |
| Forfatter: | Lagdommer Lillebø. Lagdommer Tenold. Kst. lagdommer Søvde. 4 meddommere |
| Lovhenvisninger: | Straffeloven (1902) §162, §34, §52 |
Sunnhordland forhøyrsrett sa 22. desember 1999 dom med slik domsslutning:
«A f. *.*..67, X, blir dømt for brot på strl §162, første og annet ledd, jf. femte ledd, til ei straff av fengsel i 3 - tre - år der soninga av 2 - to - år blir utsett i ei prøvetid på 2 - to - år etter strl §52. Til frådrag i den ubetinga delen av straffa går 52 - femtito - dagar for varetektsfengsling.
I medhald av strl §34 blir kr 60.000 - kronersekstitusen 00/100 - inndratt hjå A.»
Påtalemakta har anka over straffutmålinga. A har motanka aksessorisk over straffa. Ved lagmannsretten sitt vedtak av 03. april 2000 vart ankene fremja.
Om bakgrunnen for saka elles vert det vist til forhøysrettens sin dom. Der står også A sine personalia. Han er domfelt ein gong før.
Påtalemakta meiner at etter rettspraksis skulle heile straffa ha vore utan vilkår. Det er m.a. vist til dommar i Rt-1998-1673, Rt-1994-1215 og Rt-1991-829. Jamvel med fengsel i 3 år utan vilkår er det i straffemildande retning lagt stor vekt på tilståinga og at han hjelpte til å oppklare saka.
A meiner prinsipalt at straffa er for streng, m.a. fordi at han tilsto utan at politiet hadde prov, at forklaringa hans er viktige prov i sakene mot to andre sikta, at det var eingongstilfelle og at han er «amatør». Politiet sitt framlegg i oversendinga til forhøyrsretten, 2 års fengsel der eit år var på vilkår, er passeleg straff. Han har likevel berre anka aksessorisk fordi vilkårsdelen av straffa ikkje har praktisk betydning for han.
Lagmannsretten meiner at straffa må skjerpast, men det er dissens om kor mykje.
A er dømd for at han i mai 1999 kjøpte ca 1 kg «amfetaminholdig stoffblanding» for kr 200.000,-, og tok vare på det i 1-2 månader til han selde det. Det er ikkje klårt kor rein amfetaminen var. Av kjøpesummen vart kr 30.000,- betalt kontant ved levering og resten var på kreditt. A selde amfetaminet i to parti, først ca 200 g for kr 60.000, og så resten for avtalt pris ca kr 250.000, men der kjøpar ikkje har betalt.
A brukar ikkje narkotika sjølv. Det kan vel vere, som han seier sjølv, at handlinga er eingongstilfelle og amatørprega, m.a. ved at han ikkje var klår over at det ikkje var lett å selje så stort parti og at han har vorte lurt med betalinga. Etter lagmannsretten sitt syn har dette likevel mindre vekt. Han involverte seg i handelen utfrå reint profittmotiv, og ville ha tent ein sekssifra sum dersom kjøparane hadde gjort opp for seg. Han selde heile partiet på slik måte at ein må rekne med at amfetaminet har kome ut på marknaden til sluttbrukarane.
Lagmannsretten meiner at domfelte bør få frådrag i straffa for at han tilsto då han vart pågripen, og at dei supplerandre opplysningane har vore til nytte for politiet.
Generelt om straffenivået i denne typen saker viser lagmannsretten til m.a. Rt-1994-1215, Rt-1995-1975 og Rt-1999-1008.
Fleirtalet - alle utanom kst. lagdommar Søvde og 1 meddommar - finn at straffa passande kan settast til fengsel i 2 år og 6 månader utan vilkår. Slik tilhøva i saka er, meiner fleirtalet at etter rettspraksis ville straffa til vanleg ha vorte ein god del høgare, men at det bør takast omsyn til domfeltes sitt samarbeid med politiet.
Mindretalet, kst. lagdommar Søvde og meddommar Opheim meiner at domfelte bør ha det press som ligg i at deler av dommen er på vilkår. Mindretalet kan vere samd i forhøyrsretten si grunngjeving, men meiner at av straffa på 3 år bør berre eitt år vere på vilkår.
Domen vert sagt i samsvar med fleirtalet sitt syn.
Domsslutning:
I forhøyrsretten sin dom vert det gjort slik endring at straffa vert sett til fengsel i 2 - to - år og 6 - seks - månader.